2Sa 2 | CopSahBible2 | STEP | ⲙⲛⲛⲥⲁ ⲛⲁⲓ ⲇⲉ ⲇⲁⲩⲉⲓⲇ ⲁϥϣⲓⲛⲉ ⲙⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉ ⲉⲛⲉⲕⲟⲩⲱϣ ⲉⲧⲣⲁⲃⲱⲕ ⲉϩⲣⲁⲓ ⲉⲟⲩⲉⲓ ⲛⲛⲉⲡⲟⲗⲓⲥ ⲛⲓⲟⲩⲇⲁ ⲡⲉϫⲉⲡϫⲟⲉⲓⲥ ⲛⲁϥ ϫⲉ ⲃⲱⲕ ⲉϩⲣⲁⲓ ⲉⲣⲟⲥ ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲧⲁⲃⲱⲕ ⲉϩⲣⲁⲓ ⲉⲁϣ ⲡⲉϫⲉⲡϫⲟⲉⲓⲥ ⲛⲁϥ ϫⲉ ⲃⲱⲕ ⲉϩⲣⲁⲓ ⲉⲭⲉⲃⲣⲱⲛ

2 Samuel 2

1 ⲙⲛⲛⲥⲁ ⲛⲁⲓ ⲇⲉ ⲇⲁⲩⲉⲓⲇ ⲁϥϣⲓⲛⲉ ⲙⲡϫⲟⲉⲓⲥ ⲉϥϫⲱ ⲙⲙⲟⲥ ϫⲉ ⲉⲛⲉⲕⲟⲩⲱϣ ⲉⲧⲣⲁⲃⲱⲕ ⲉϩⲣⲁⲓ ⲉⲟⲩⲉⲓ ⲛⲛⲉⲡⲟⲗⲓⲥ ⲛⲓⲟⲩⲇⲁ ⲡⲉϫⲉⲡϫⲟⲉⲓⲥ ⲛⲁϥ ϫⲉ ⲃⲱⲕ ⲉϩⲣⲁⲓ ⲉⲣⲟⲥ ⲡⲉϫⲉⲇⲁⲩⲉⲓⲇ ⲛⲁϥ ϫⲉ ⲧⲁⲃⲱⲕ ⲉϩⲣⲁⲓ ⲉⲁϣ ⲡⲉϫⲉⲡϫⲟⲉⲓⲥ ⲛⲁϥ ϫⲉ ⲃⲱⲕ ⲉϩⲣⲁⲓ ⲉⲭⲉⲃⲣⲱⲛ 2 ⲁⲩⲱ ⲇ︤ⲁ︦ⲇ︥ ⲁϥⲃⲱⲕ ⲉϩⲣⲁⲓ ⲉⲭⲉⲃⲣⲱⲛ ⲁⲩⲱ ⲧⲉϥⲥϩⲓⲙⲉ ⲥⲛⲧⲉ ⲛⲙⲙⲁϥ ⲁⲭⲓⲛⲁⲁⲃ ⲧⲓⲥⲣⲁⲏⲗⲓⲧⲏⲥ ⲁⲩⲱ ⲁⲃⲓⲕⲓⲁ ⲧⲉⲥϩⲓⲙⲉ ⲛⲁⲃⲁⲗ ⲡⲕⲁⲣⲙⲏⲗⲟⲥ 3 ⲁⲩⲱ ⲛⲉϥⲣⲱⲙⲉ ⲉⲧⲛⲙⲙⲁϥ ⲡⲟⲩⲁ ⲡⲟⲩⲁ ⲙⲛ ⲡⲉϥⲏⲓ ⲁⲩⲟⲩⲱϩ ϩⲛ ⲛⲉⲡⲟⲗⲓⲥ ⲛⲭⲉⲃⲣⲱⲛ 4 ⲁⲩⲉⲓ ⲇⲉ ⲛϭⲓ ⲛⲉⲣⲱⲙⲉ ⲛⲓⲟⲩⲇⲁ ⲁⲩⲧⲱϩⲥ ⲛⲇ︤ⲁ︦ⲇ︥ ϩⲙ ⲡⲙⲁ ⲉⲧⲙⲙⲁⲩ ⲉⲧⲣⲉϥⲣⲣⲣⲟ ϩⲙ ⲡⲙⲁ ⲉⲧⲙⲙⲁⲩ ⲉϫⲙ ⲡⲏⲓ ⲛⲓⲟⲩⲇⲁ ⲁⲩⲧⲁⲙⲉⲇⲁⲩⲉⲓⲇ ⲇⲉ ϫⲉ ⲛⲣⲱⲙⲉ ⲛⲓⲁⲃⲓⲥ ⲛⲧⲉ ⲅⲁⲗⲁⲁⲇ ⲁⲩⲧⲱⲙⲥ ⲛⲥⲁⲟⲩⲗ ⲙⲛ ⲓⲱⲛⲁⲑⲁⲛ 5 ⲁⲩⲱ ⲥⲁⲟⲩⲗ ⲁϥϫⲟⲟⲩ ⲛϩⲉⲛⲃⲁⲓϣⲓⲛⲉ ⲉⲣⲁⲧⲟⲩ ⲛⲛⲉⲛⲟϭ ⲛⲓⲁⲃⲓⲥ ⲛⲧⲉ ⲅⲁⲗⲁⲁⲇ ⲉϥϫⲱ ⲙⲙⲟⲥ ⲛⲁⲩ ϫⲉ ⲧⲉⲧⲛⲥⲙⲁⲙⲁⲁⲧ ⲛⲧⲱⲧⲛ ⲛⲧⲟⲟⲧϥ ⲙⲡϫⲟⲉⲓⲥ ϫⲉ ⲁⲧⲉⲧⲛⲉⲓⲣⲉ ⲙⲡⲉⲓⲛⲁ ⲉϫⲙ ⲡⲉⲧⲛϫⲟⲉⲓⲥ ⲥⲁⲟⲩⲗ ⲡⲉⲭ︤ⲣ︦ⲥ︥ ⲙⲡϫⲟⲉⲓⲥ ⲉⲁⲧⲉⲧⲛⲧⲟⲙⲥϥ ⲙⲛ ⲓⲱⲛⲁⲑⲁⲛ ⲡⲉϥϣⲏⲣⲉ 6 ⲧⲉⲛⲟⲩ ϭⲉ ⲉⲣⲉⲡϫⲟⲉⲓⲥ ⲉⲓⲣⲉ ⲛⲙⲙⲏⲧⲛ ⲛⲟⲩⲛⲁ ⲙⲛ ⲟⲩⲙⲉ ⲁⲛⲟⲕ ϩⲱ ⲉⲓⲉⲉⲓⲣⲉ ⲛⲙⲙⲏⲧⲛ ⲙⲡⲁⲅⲁⲑⲟⲛ ⲉⲃⲟⲗ ϫⲉ ⲁⲧⲉⲧⲛⲉⲓⲣⲉ ⲙⲡⲉⲓϣⲁϫⲉ 7 ⲧⲉⲛⲟⲩ ϭⲉ ⲙⲁⲣⲉⲛⲉⲧⲛϭⲓϫ ⲧⲁϫⲣⲟ ⲛⲧⲉⲧⲛϣⲱⲡⲉ ⲛϩⲉⲛⲣⲱⲙⲉ ⲛϫⲱⲱⲣⲉ ⲉⲃⲟⲗ ϫⲉ ⲡⲉⲧⲛϫⲟⲉⲓⲥ ⲥⲁⲟⲩⲗ ⲁϥⲙⲟⲩ ⲁⲩⲱ ⲁⲛⲟⲕ ⲁⲡⲏⲓ ⲛⲓⲟⲩⲇⲁ ⲧⲁϩⲥⲧ ⲉⲧⲣⲁⲣⲣⲣⲟ ⲉϩⲣⲁⲓ ⲉϫⲱⲟⲩ 8 ⲁⲩⲱ ⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲡⲁⲣⲭⲓⲥⲧⲣⲁⲧⲏⲅⲟⲥ ⲛⲥⲁⲟⲩⲗ ⲁϥϫⲓ ⲛⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲁϥⲉⲓⲛⲉ ⲙⲙⲟϥ ⲉⲃⲟⲗ ϩⲛ ⲧⲡⲁⲣⲉⲙⲃⲟⲗⲏ ⲉϩⲣⲁⲓ ⲉⲙⲁⲛⲁⲁⲙ 9 ⲁϥⲁⲁϥ ⲛⲣⲣⲟ ⲉϩⲣⲁⲓ ⲉϫⲛ ⲅⲁⲗⲁⲁⲇ ⲁⲩⲱ ⲉϩⲣⲁⲓ ⲉϫⲛ ⲑⲁⲥⲓⲣⲓ ⲁⲩⲱ ⲉϫⲙ ⲡⲓ︤ⲏ︦ⲗ︥ ⲁⲩⲱ ⲉϫⲛ ⲉⲫⲣⲁⲓⲙ ⲁⲩⲱ ⲉϫⲛ ⲃⲉⲛⲓⲁⲙⲓⲛ ⲁⲩⲱ ⲉϫⲙ ⲡⲓ︤ⲏ︦ⲗ︥ ⲧⲏⲣϥ 10 ⲓⲉⲃⲟⲥⲑⲉ ⲇⲉ ⲡϣⲏⲣⲉ ⲛⲥⲁⲟⲩⲗ ⲛⲉϥϩⲛϩⲙⲉ ⲛⲣⲟⲙⲡⲉ ⲡⲉ ⲛⲧⲉⲣⲉϥⲣⲣⲣⲟ ⲉϫⲙ ⲡⲓ︤ⲏ︦ⲗ︥ ⲁⲩⲱ ⲁϥⲣⲣⲟⲙⲡⲉ ⲥⲛⲧⲉ ⲉϥⲟ ⲛⲣⲣⲟ ϣⲁⲧⲙ ⲡⲏⲓ ⲛⲓⲟⲩⲇⲁ ⲛⲁⲓ ⲛⲧⲁⲩⲟⲩⲁϩⲟⲩ ⲛⲥⲁ ⲇ︤ⲁ︦ⲇ︥ 11 ⲁⲩϣⲱⲡⲉ ⲛϭⲓ ⲛⲉϩⲟⲟⲩ ⲛⲧⲁⲇ︤ⲁ︦ⲇ︥ ⲁⲁⲩ ϩⲛ ⲭⲉⲃⲣⲱⲛ ⲉϥⲟ ⲛⲣⲣⲟ ⲉϫⲙ ⲡⲏⲓ ⲛⲓⲟⲩⲇⲁ ⲉⲩⲛⲁⲣⲥⲁϣϥⲉ ⲛⲣⲟⲙⲡⲉ ⲙⲛ ⲥⲟⲟⲩ ⲛⲉⲃⲟ 12 ⲁⲩⲱ ⲁϥⲓ ⲉⲃⲟⲗ ⲛϭⲓ ⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ ⲁⲩⲱ ⲛϩⲙϩⲁⲗ ⲛⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲉⲃⲟⲗ ϩⲙ ⲙⲁⲛⲁⲉⲓⲙ ⲉϩⲣⲁⲓ ⲉⲅⲁⲃⲁⲱⲛ 13 ⲓⲱⲁⲃ ϩⲱⲱϥ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲁⲩⲱ ⲛϩⲙϩⲁⲗ ⲛⲇⲁⲩⲉⲓⲇ ⲉⲃⲟⲗ ϩⲛ ⲭⲉⲃⲣⲱⲛ ⲁⲩⲧⲱⲙⲛⲧ ⲉⲣⲟⲟⲩ ϩⲓϫⲛ ⲧⲉⲕⲣⲏⲛⲏ ⲛⲅⲁⲃⲁⲱⲛ ⲉⲩϩⲓ ⲛⲉⲩⲉⲣⲏⲩ ⲁⲩⲱ ⲛⲁⲓ ⲛⲉ ⲁⲩϩⲙⲟⲟⲥ ϩⲓϫⲛ ⲧⲉⲕⲣⲏⲛⲏ ⲛⲅⲁⲃⲁⲱⲛ ⲛⲥⲁ ⲡⲓⲥⲁ ⲛⲉⲓⲕⲟⲟⲩⲉ ⲁⲩϩⲙⲟⲟⲥ ⲛⲥⲁ ⲡⲓⲥⲁ 14 ⲡⲉϫⲉⲁⲃⲉⲛⲛⲏⲣ ⲇⲉ ⲉϩⲟⲩⲛ ϩⲛ ⲓⲱⲁⲃ ϫⲉ ⲙⲁⲣⲉⲛⲉϣⲏⲣⲉ ϣⲏⲙ ⲧⲱⲟⲩⲛ ⲛⲥⲉⲥⲱⲃⲉ ϩⲓϩⲏ ⲙⲙⲟⲛ ⲡⲉϫⲉⲓⲱⲁⲃ ⲛⲁϥ ϫⲉ ⲙⲁⲣⲟⲩⲧⲱⲟⲩⲛ 15 ⲁⲩⲱ ⲁⲩⲧⲱⲟⲩⲛ ⲁⲩⲉⲓ ⲉⲧⲙⲏⲧⲉ ⲛϭⲓ ⲙⲛⲧⲥⲛⲟⲟⲩⲥ ⲛϣⲏⲣⲉ ϣⲏⲙ ⲛⲧⲉ ⲃⲉⲛⲓⲁⲙⲓⲛ ⲉⲧⲏⲡ ⲉⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲙⲛ ⲙⲛⲧⲥⲛⲟⲟⲩⲥ ϩⲱⲟⲩ ⲉⲃⲟⲗ ϩⲛ ⲛⲉϩⲙϩⲁⲗ ⲛⲇ︤ⲁ︦ⲇ︥ 16 ⲁⲩⲱ ⲡⲟⲩⲁ ⲡⲟⲩⲁ ⲁϥⲁⲙⲁϩⲧⲉ ⲛⲧⲁⲡⲉ ⲙⲡⲉⲑⲓⲧⲟⲩⲱϣ ⲉⲁⲡⲟⲩⲁ ⲡⲟⲩⲁ ⲧⲉⲣⲧⲣⲧⲉϥⲥⲏϥⲉ ⲉⲡⲉⲥⲡⲓⲣ ⲙⲡⲉⲑⲓⲧⲟⲩⲱϥ ⲁⲩⲣⲱϩⲧ ⲉⲡⲕⲁϩ ϩⲓ ⲟⲩⲥⲟⲡ ⲁⲩⲙⲟⲩⲧⲉ ⲇⲉ ⲉⲡⲣⲁⲛ ⲙⲡⲙⲁ ⲉⲧⲙⲙⲁⲩ ϫⲉ ⲧⲙⲉⲣⲓⲥ ⲛⲛⲉⲡⲓⲃⲟⲩⲗⲟⲥ ⲧⲁⲓ ⲉⲧϣⲟⲟⲡ ϩⲛ ⲅⲁⲃⲁⲱⲛ 17 ⲁⲩⲱ ⲟⲩⲛⲟϭ ⲙⲡⲟⲗⲉⲙⲟⲥ ⲉϥⲛⲁϣⲧ ⲉⲙⲁⲧⲉ ⲁϥϣⲱⲡⲉ ⲙⲡⲉϩⲟⲟⲩ ⲉⲧⲙⲙⲁⲩ ⲁϥϭⲱⲧⲡ ⲇⲉ ⲛϭⲓ ⲁⲃⲉⲛⲛⲏⲣ ⲙⲛ ⲛⲉⲣⲱⲙⲉ ⲙⲡⲓ︤ⲏ︦ⲗ︥ ϩⲓⲑⲏ ⲛⲛⲉϩⲙϩⲁⲗ ⲛⲇ︤ⲁ︦ⲇ︥ 18 ⲛⲉⲩⲉⲙⲙⲁⲩ ⲇⲉ ⲛϭⲓ ⲡϣⲟⲙⲛⲧ ⲛϣⲏⲣⲉ ⲛⲥⲁⲣⲟⲩⲉⲓⲁⲥ ⲓⲱⲁⲃ ⲙⲛ ⲁⲃⲓⲥⲁ ⲁⲩⲱ ⲁⲍⲁⲏⲗ ⲉⲣⲉⲣⲁⲧϥ ⲁⲥⲱⲟⲩ ⲉⲣⲟϥ ⲛⲑⲉ ⲛⲟⲩⲉⲓ ⲛⲛⲉⲓϭⲁϩⲥⲉ ⲉⲧϩⲛⲧⲥⲱϣⲉ 19 ⲁⲍⲁⲏⲗ ⲇⲉ ⲁϥⲡⲱⲧ ⲛⲥⲁ ⲁⲃⲉⲛⲛⲏⲣ ⲙⲡⲉϥⲁⲗⲉϥ ⲉⲃⲟⲗ ⲙⲙⲟϥ ⲉⲃⲱⲕ ⲉⲟⲩⲛⲁⲙ ⲏ ⲉϩⲃⲟⲩⲣ ⲉϥⲡⲏⲧ ϩⲓⲛⲁⲓ ⲛⲥⲁ ⲁⲃⲉⲛⲛⲏⲣ 20 ⲁⲃⲉⲛⲛⲏⲣ ⲇⲉ ⲁϥⲕⲟⲧϥ ⲉⲡⲁϩⲟⲩ ⲡⲉϫⲁϥ ⲛⲁϥ ϫⲉ ⲉⲓⲉ ⲛⲧⲟⲕ ⲡⲉ ⲁⲍⲁⲏⲗ ⲉⲕⲡⲏⲧ ⲛⲥⲱⲓ ⲡⲉϫⲁϥ ϫⲉ ⲁⲛⲟⲕ ⲡⲉ 21 ⲡⲉϫⲉⲁⲃⲉⲛⲛⲏⲣ ⲛⲁϥ ϫⲉ ⲧⲁⲁⲕ ⲉⲟⲩⲛⲁⲙ ⲏ ⲉϩⲃⲟⲩⲣ ⲛⲅϭⲉⲡⲟⲩⲁ ⲛⲁⲕ ⲛⲛⲉϣⲏⲣⲉ ϣⲏⲙ ⲛⲅⲃⲟϣϥ ⲛⲧⲉϥⲡⲁⲛϩⲟⲡⲗⲓⲁ ⲛⲅϥⲓⲧⲥ ⲛⲁⲕ ⲁⲩⲱ ⲙⲡⲉⲁⲥⲁⲏⲗ ⲣϩⲛⲁϥ ⲉⲃⲱⲗ ⲉⲃⲟⲗ ⲙⲙⲟϥ ⲉⲃⲱⲕ ⲉⲗⲁⲁⲩ ⲛⲥⲁ 22 ⲁⲃⲉⲛⲛⲏⲣ ⲇⲉ ⲁϥⲟⲩⲱϩ ⲉⲧⲟⲟⲧϥ ⲉϣⲁϫⲉ ⲙⲛ ⲁⲍⲁⲏⲗ ⲉϥϫⲱ ⲙⲙⲟⲥ ϫⲉ ⲡⲁϣⲥⲕ ⲉⲃⲟⲗ ⲙⲙⲟⲓ ⲙⲡⲣⲧⲁⲕⲁⲧ ⲛⲧⲁⲣⲁϩⲧⲕ ⲉⲡⲕⲁϩ ⲁⲩⲱ ⲉⲓⲛⲁⲉϣϥⲓⲉⲓⲁⲧ ⲉϩⲣⲁⲓ ⲛⲁϣ ⲛϩⲉ ⲟⲩⲃⲉ ⲡⲉⲕⲥⲟⲛ ⲓⲱⲁⲃ ⲉⲕⲣⲣⲟⲩ ϩⲓⲛⲁⲓ ⲕⲁⲣⲁⲧⲕ ⲉⲣⲁⲧϥ ⲙⲡⲉⲕⲥⲟⲛ ⲓⲱⲁⲃ 23 ⲁⲩⲱ ⲙⲡⲉϥⲉⲣϩⲛⲁϥ ⲉⲥⲁϩⲱⲱϥ ⲉⲃⲟⲗ ⲙⲙⲟϥ ⲁⲃⲉⲛⲛⲏⲣ ⲇⲉ ⲁϥϫⲁⲧϥ ⲛⲧⲉϥⲗⲟⲅⲭⲏ ⲉϫⲛ ⲛⲉϥϭⲗⲟⲟⲧⲉ ⲛⲥⲁ ⲡⲁϩⲟⲩ ⲁⲧⲗⲟⲅⲭⲏ ϫⲱⲧⲉ ⲉⲃⲟⲗ ⲛϩⲏⲧϥ ⲁⲩⲱ ⲟⲩⲟⲛ ⲛⲓⲙ ⲉϥϣⲁⲛⲡⲱϩ ⲉⲡⲙⲁ ⲛⲧⲁⲁⲍⲁⲏⲗ ϩⲉ ⲛϩⲏⲧϥ ⲁϥⲙⲟⲩ ϣⲁϥⲧⲱⲱϭⲉ ⲛϥⲁϩⲉⲣⲁⲧϥ 24 ⲓⲱⲁⲃ ⲇⲉ ⲙⲛ ⲁⲃⲓⲥⲁ ⲁⲩⲧⲁⲁⲩ ⲛⲥⲁ ⲁⲃⲉⲛⲛⲏⲣ ⲁⲩⲱ ⲡⲣⲏ ⲁϥϩⲱⲧⲡ ⲛⲧⲟⲟⲩ ⲇⲉ ⲁⲩⲃⲱⲕ ⲉϩⲟⲩⲛ ϣⲁ ⲡⲃⲟⲩⲛⲟⲥ ⲛⲁⲙⲙⲁⲛ ⲡⲁⲓ ⲉⲧϩⲓϩⲏ ⲛⲅⲁⲓ ϩⲛ ⲧⲉϩⲓⲏ ⲛϫⲁⲓⲉ ⲛⲧⲉ ⲅⲁⲃⲁⲱⲛ 25 ⲁⲩⲥⲱⲟⲩϩ ⲇⲉ ⲉϩⲟⲩⲛ ⲛϭⲓ ⲛϣⲏⲣⲉ ⲛⲃⲉⲛⲓⲁⲙⲓⲛ ⲉⲧⲟⲩⲏϩ ⲛⲥⲁ ⲁⲃⲉⲛⲛⲏⲣ ⲁⲩϣⲱⲡⲉ ϩⲓ ⲛⲉⲩⲉⲣⲏⲩ ⲁⲩⲁϩⲉⲣⲁⲧⲟⲩ ϩⲓϫⲛ ⲧⲁⲡⲉ ⲛⲟⲩⲃⲟⲩⲛⲟⲥ ⲛⲟⲩⲱⲧ 26 ⲁⲩⲱ ⲁⲃⲉⲛⲛⲏⲣ ⲁϥⲙⲟⲩⲧⲉ ⲉⲃⲟⲗ ⲉⲓⲱⲁⲃ ⲉϥϫⲱ ⲙⲙⲟⲥ ⲛⲁϥ ϫⲉ ⲙⲏ ⲉⲣⲉⲧⲉⲕⲥⲏϥⲉ ⲛⲁⲟⲩⲱⲙ ϣⲁⲃⲟⲗ ⲉⲩϣⲟⲩϣⲟⲩ ⲏ ⲛⲅⲥⲟⲟⲩⲛ ⲁⲛ ϫⲉ ϣⲁⲥⲟⲩⲱ ⲛⲥⲥⲓϣⲉ ⲉⲑⲁⲏ ⲁⲩⲱ ϣⲁⲛⲧⲉ ⲟⲩ ϭⲉ ϣⲱⲡⲉ ⲛⲅⲛⲁϫⲟⲟⲥ ⲁⲛ ⲙⲡⲉⲕⲗⲁⲟⲥ ⲉⲧⲣⲉⲩⲗⲟ ⲉⲩⲡⲏⲧ ⲛⲥⲁ ⲛⲉⲩⲥⲛⲏⲩ 27 ⲡⲉϫⲉⲓⲱⲁⲃ ⲛⲁϥ ϫⲉ ϥⲟⲛϩ ⲛϭⲓ ⲡϫⲟⲉⲓⲥ ϫⲉ ⲉⲛⲉⲙⲡⲉⲕϣⲁϫⲉ ⲛⲉⲣⲉⲡⲗⲁⲟⲥ ⲛⲁϭⲱ ⲛϫⲓⲛⲉ ϩⲧⲟⲟⲩⲉ ⲉⲣⲉⲡⲟⲩⲁ ⲡⲟⲩⲁ ⲡⲏⲧ ⲛⲥⲁ ⲡⲉϥⲥⲟⲛ 28 ⲁⲩⲱ ⲓⲱⲁⲃ ⲁϥⲥⲁⲗⲡⲓⲍⲉ ϩⲛ ⲧⲥⲁⲗⲡⲓⲅⲝ ⲁⲡⲗⲁⲟⲥ ⲧⲏⲣϥ ⲱⲗ ⲉⲃⲟⲗ ⲁⲩⲗⲟ ⲉⲩⲡⲏⲧ ⲛⲥⲁ ⲡⲓ︤ⲏ︦ⲗ︥ ⲙⲡⲟⲩⲱϩ ϭⲉ ⲉⲧⲟⲟⲧⲟⲩ ⲉⲙⲓϣⲉ ⲙⲛ ⲛⲉⲩⲉⲣⲏⲩ 29 ⲁⲩⲱ ⲁⲃⲉⲛⲛⲏⲣ ⲙⲛ ⲛⲉϥⲣⲱⲙⲉ ⲁⲩⲃⲱⲕ ⲉϩⲣⲁⲓ ⲉⲙⲙⲁ ⲛϩⲱⲧⲡ ⲏ ⲉⲡⲉⲙⲛⲧ ⲛⲧⲉⲩϣⲏ ⲉⲧⲙⲙⲁⲩ ⲁⲩⲱ ⲁⲩϫⲓⲟⲟⲣ ϩⲙ ⲡⲓⲟⲣⲇⲁⲛⲏⲥ ⲁⲩⲙⲟⲟϣⲉ ϩⲛ ⲃⲟⲑⲟⲣⲟⲛ ⲧⲏⲣⲥ ⲁⲩⲉⲓ ⲉϩⲣⲁⲓ ⲉⲧⲡⲁⲣⲉⲙⲃⲟⲗⲏ 30 ⲓⲱⲁⲃ ⲇⲉ ϩⲱⲱϥ ⲁϥⲕⲧⲟϥ ⲉⲃⲟⲗ ϩⲛ ⲁⲃⲉⲛⲛⲏⲣ ⲁⲩⲥⲱⲟⲩϩ ⲇⲉ ⲉϩⲟⲩⲛ ⲙⲡⲗⲁⲟⲥ ⲧⲏⲣϥ ⲁⲩⲕⲱⲧⲉ ⲛⲥⲁ ⲙⲛⲧⲯⲓⲥ ⲛⲣⲱⲙⲉ ⲉⲃⲟⲗ ϩⲛ ⲛⲉϩⲙϩⲁⲗ ⲛⲇⲁⲩⲉⲓⲇ ⲙⲛ ⲁⲍⲁⲏⲗ ⲉⲁⲩⲙⲟⲩ 31 ⲛⲉϩⲙϩⲁⲗ ⲇⲉ ⲛⲇ︤ⲁ︦ⲇ︥ ⲁⲩⲡⲁⲧⲁⲥⲥⲉ ⲉⲃⲟⲗ ϩⲛ ⲛⲉϣⲏⲣⲉ ⲛⲃⲉⲛⲓⲁⲙⲓⲛ ⲛⲉⲧⲟⲩⲏϩ ⲛⲥⲁ ⲁⲃⲉⲛⲛⲏⲣ ⲉⲩⲛⲁⲣϣⲟⲙⲛⲧ ⲛϣⲉ ⲛⲣⲱⲙⲉ ⲉⲩⲏⲡ ⲉⲣⲟϥ 32 ⲁⲩϥⲓ ⲇⲉ ⲛⲁⲍⲁⲏⲗ ⲁⲩⲧⲟⲙⲥϥ ϩⲙ ⲡⲧⲁⲫⲟⲥ ⲙⲡⲉϥⲉⲓⲱⲧ ϩⲛ ⲃⲏⲑⲗⲉⲉⲙ ⲁⲩⲱ ⲁϥⲃⲱⲕ ⲛϭⲓ ⲓⲱⲁⲃ ⲙⲛ ⲛⲣⲱⲙⲉ ⲉⲧⲛⲙⲙⲁϥ ⲛⲧⲉⲩϣⲏ ⲧⲏⲣⲥ ⲁⲡⲟⲩⲟⲉⲓⲛ ⲉⲓ ⲉⲃⲟⲗ ⲛⲁⲩ ϩⲛ ⲭⲉⲃⲣⲱⲛ